لەکاتێکدا دۆناڵد ترەمپ، سەرۆکی ئەمریکا پەیامی دژبەیەک لەبارەی ئێرانەوە دەنێرێت و لە نێوان هەڕەشەی سەربازی و ئەگەری گەیشتن بە رێککەوتندا هاتوچۆ دەکات، رایگەیاند کە رۆژی یەکشەممە هیچ هێرشێک ناکرێتە سەر ئێران. هاوکات پەرەسەندنە سەربازییەکان لە ناوچەکە بەردەوامن و حووسییەکانی یەمەنیش دووبارە هێرشیان کردووەتەسەر سعودیە.

رۆژی یەکشەممە 25ی تشرینی یەکەمی 2026، پێش ئەوەی ترەمپ بەرەو میشیگن بەڕێبکەوێت بۆ بەشداریکردن لە گردبوونەوەیەکی هەڵبژاردنی نیوەخولی کۆنگرێس، لە بەردەم رۆژنامەڤاناندا هێرشی ئاسمانی لەم رۆژەدا رەتکردەوە و سەبارەت بە ئەگەری هێرشکردنە سەر ئێران گوتی: "وەڵامەکە نەخێرە، ئەمڕۆ هیچ هێرشێک نابێت".

لە هەڤپەیڤینێکیشدا لەگەڵ تۆڕی فۆکس نیووز، سەرۆکی ئەمریکا ئاماژەی بە بژاردەکانی وڵاتەکەی کرد و ڕایگەیاند: "ئایا رێککەوتنیان لەگەڵدا بکەم یان بە تەواوی لەنێویان ببەم؟ ئەوە تاکە پرسیارە". سەبارەت بە دۆخی دەریایی و گەرووە ئاوییەکانیش، ناوبراو ئەوەی خستەڕوو کە ئێستا ئەمریکا کۆنترۆڵی تەنگەی ستراتیژیی هورمز دەکات.

لێدوانەکانی ترەمپ لە کاتێکدان کە رۆژی شەممە ڕایگەیاندبوو واشنتن لەبەردەم دوو بژاردەدایە: یان دەستپێکردنەوەی هێرش یان گەیشتن بە "رێککەوتنێکی مەزن و ناوازە" لەگەڵ تاران. لە بەرامبەردا، مەسعود پزیشکیان، سەرۆککۆماری ئێران، واشنتنی بە پەکخستنی گفتوگۆکان تۆمەتبار کرد، بەڵام جەختی لە سووربوونی تاران لەسەر گەیشتن بە رێککەوتن کردەوە. لە لایەکی دیکەشەوە، سەرەڕای گوشارەکانی بنیامین نەتەنیاهوو، سەرۆکوەزیرانی ئیسرائیل، بۆ دەستپێکردنەوەی هێرشی بەرفراوان، بەپێی راپۆرتە رۆژنامەڤانییەکان پلانی سوپای ئیسرائیل بۆ بۆردوومانکردنی ئێران لە 10ی تشرینی یەکەم، بەهۆی دژایەتیی ترەمپەوە پێش هەڵبژاردنەکانی نیوەخول پاشەکشەی پێکرا.

لە گۆڕەپانێکی پێشوەختەی جیاوازدا لە سعودیە، سەرەڕای ئەوەی فڕۆکەخانەی نێودەوڵەتیی ریاز دوای زنجیرەیەک هێرش (لەوانەش هێرشەکەی 10ی تشرینی یەکەم کە بۆ ماوەیەک فڕۆکەخانەکەی داخرابوو و بووە هۆی کوژران و برینداربوونی سەدان کەس) دیسانەوە کرایەوە، بەڵام حووسییەکانی یەمەن دووبارە هێرشیان کردەوە سەر فڕۆکەخانەکە و چەند پێگەیەکی دیکە. هاوپەیمانیی عەرەبی رایگەیاند کە 10 مووشەکی بالیستیی حووسییەکانی لە باشووری شانشینەکە تێکشکاندووە.

سەبارەت بەم هێرشانە، یەحیا سەریع، گوتەبێژی سەربازیی حووسییەکان لە تۆڕی کۆمەڵایەتیی ئێکس ڕایگەیاند: "هێزە چەکدارەکانی یەمەن سێ ئۆپەراسیۆنی سەربازییان بە دەیان مووشەکی بالیستی کردووە" و جەختیکردەوە کە هێرشەکەی سەر فڕۆکەخانەی ریاز "ئامانجەکەی پێکا"، هەروەها بنکەی ئاسمانیی شا خالید لە خەمیس موشەیت و بنکەیەکی دەریاییان لە جازان کردووەتە ئامانج. داتاکانی ماڵپەڕی فلایت راداری 24ـیش ئاماژە بەوە دەکەن کە سەرەڕای دەستپێکردنەوەی گەشتەکان، هێشتا جووڵەی فڕۆکەوانی لە فڕۆکەخانەی ریاز سنووردارە.