لەکاتێکدا هەوڵە دیپلۆماسییەکان بۆ کۆتاییهێنان بە جەنگ چڕبوونەتەوە، ئاسمانی رووسیا و ئۆکراینا شەوێکی پڕ لە ئاگر و هێرشی بێپێشینەیان بەڕێکرد.

وەزارەتی بەرگریی رووسیا رایگەیاند، تەنیا لە شەوی رابردوودا سوپای وڵاتەکەی 808 درۆنی ئۆکراینای خستووەتە خوارەوە. ئەمەش تەنیا چەند کاژێرێک دوای کۆبوونەوەی نێوان ڤلادیمیر پووتین، سەرۆکی رووسیا و ستیڤ ویتکۆف، نێردەی تایبەتی ئەمریکا لە شاری سان پترسبۆرگ روویدا. لەم هێرشانەدا سیستمی بەرگریی ئاسمانیی رووسیا لە چەندین ناوچەی جیاوازی وڵاتەکە و نیمچەدوورگەی کریمیا رووبەڕووی درۆنەکان بووەتەوە.

سێرگی سۆبیانین، سەرۆکی شارەوانیی مۆسکۆ لە پەیامێکدا روونیکردەوە، هێزەکانی بەرگریی ئاسمانی توانیویانە بەشێک لەو 630 درۆنە تێکبشکێنن کە بەرەو ناوچەکە ئاراستە کرابوون، لە کاتێکدا 163 درۆن نزیکبوونەتەوە لە پایتەخت. هێرشەکان لە نێوان کاژێر 8:30ـی شەوی چوارشەممە تاوەکو 4:00ـی بەرەبەیانی ئەمڕۆ پێنجشەممە، 22ـی تشرینی یەکەمی 2026، بەردەوام بوون و بەهۆیانەوە دوو کەس لە دەرەوەی مۆسکۆ بریندار بوون. هاوکات، یگۆر کۆڤاڵچوک، حاکمی بریانسک ئاشکرای کرد، لە هێرشێکی درۆنیدا بۆ سەر ئۆتۆمبێلێک لە رۆژئاوای رووسیا، گەنجێکی تەمەن 19 ساڵ کوژراوە و دوو کەسی دیکەش بریندار بوون.

لە بەرامبەردا، دەسەڵاتدارانی ئۆکراینا رایانگەیاند، لە هێرشە مووشەکی و درۆنییەکانی شەوی رابردووی رووسیا، لانیکەم حەوت کەس کوژراون. قوربانییەکان پێکهاتوون لە پیاوێک لە سومی، ژنێک لە خارکیڤ، سێ کەس لە زاپۆریژیا و دوو کەس لە دۆنێتسک. لە کیێڤی پایتەختیش، بەهۆی کەوتنەوەی پاشماوەی هێرشەکان، زیان بە تۆڕی میترۆ لەسەر پردی پیڤدێنی گەیشتووە و 15 کەسیش بریندار بوون.

سەرەڕای ئەم گرژییانە، هەوڵە دیپلۆماسییەکان بەردەوامن. یووری ئوشاکۆڤ، راوێژکاری کرێملین بۆ کاروباری دەرەوە، رۆژی چوارشەممە رایگەیاند کە پووتین رەزامەندیی نیشانداوە لەسەر دەستپێکردنەوەی دانوستاندنی سێقۆڵی لە نێوان رووسیا، ئەمریکا و ئۆکراینا لە دوای 10ی تشرینی دووەم، واتە یەک هەفتە دوای هەڵبژاردنەکانی نیوەخولی کۆنگرێس لە ئەمریکا. ڤۆلۆدیمیر زیلینسکی، سەرۆکی ئۆکرایناش پشتگیریی لە دەستپێکردنەوەی گفتوگۆکان کرد، بەڵام بە نیگەرانییەوە کەمێک پێش لێدانی زەنگەکانی ئاگادارکردنەوە لە کیێڤ گوتی: "با بیبەینە دواوە و ببینین ئەمجارە چی روودەدات".