شێرکۆ بێکەس (١٩٤٠-٢٠١٣)، یەکێک لە گەورەترین و کاریگەرترین شاعیرە نوێخوازەکانی ھاوچەرخی کوردە، کە بە قەڵەمە بڕندەکەی و شێوازە داھێنەرانەکەی شۆڕشێکی گەورەی لە شیعری کوردیدا بەرپا کرد. ئەو کوڕی شاعیری نیشتمانپەروەری ناوداری کورد، فایەق بێکەسە، و لە ٢ی ئایاری ساڵی ١٩٤٠ لە گەڕەکی گۆیژەی شاری سلێمانی لەدایکبووە. پەروەردەبوونی لە ماڵباتێکی ئەدەبی و نیشتمانپەروەردا کاریگەرییەکی قوڵی لەسەر دروستبوونی کەسایەتیی شیعریی و ھەستی نەتەوەیی ئەو ھەبوو.
لە ساڵانی حەفتاکاندا، شێرکۆ بێکەس لەگەڵ چەند نووسەر و شاعیرێکی تردا بەیاننامەی "ڕوانگە"یان بڵاوکردەوە، کە ئامانج لێی نوێکردنەوەی ئەدەب و زمانی کوردی و دەرچوون بوو لە قاڵبە باوەکانی پێشتر. بەھۆی ھەڵوێستە نەتەوەییەکانی و شیعرە نیشتمانییەکانییەوە، ڕووبەڕووی زەخت و ڕاوەدوونانی ڕژێمی بەعس بووەوە و دواتر پەیوەندی بە ڕیزەکانی پێشمەرگەوە کرد، کە لەوێشدا لە ڕێگەی ڕادیۆی "دەنگی شاخ"ەوە شیعرەکانی دەبوونە بزوێنەری ھەستی شۆڕشگێڕیی خەڵک.
بەھۆی سەختیی بارودۆخەکەوە، لە ساڵی ١٩٨٦ ناچار دەبێت وڵاتی عێراق و کوردستان بەجێبھێڵێت و ڕوو لە ھەندەران بکات. لە ساڵەکانی ١٩٨٧ تا ١٩٩٢ لە وڵاتی سوید نیشتەجێ دەبێت. لەم قۆناغەدا دەنگی شیعریی شێرکۆ سنوورەکان دەبڕێت و دەگاتە ئاستی جیھانی؛ زۆرێک لە شیعرەکانی بۆ چەندین زمانی زیندووی جیھانی (وەک ئینگلیزی، فەرەنسی، ئەڵمانی، سویدی، عەرەبی و تورکی) وەردەگێڕدرێن. لەبەرامبەر شیعرە مرۆڤدۆستانە و ئازادیخوازەکانی، لە ساڵی ١٩٨٧ لە سوید "خەڵاتی تۆخۆڵسکی" پێدەبەخشرێت، کە خەڵاتێکی گرنگی نێودەوڵەتییە و ڕاستەوخۆ لەلایەن سەرۆکوەزیرانی ئەو دەمی سوێد، ئیگڤار کالرسۆنەوە پێشکەشی دەکرێت.
پاش ڕاپەڕینی بەھاری ساڵی ١٩٩١، شێرکۆ دەگەڕێتەوە بۆ باوەشی نیشتمان. لە ساڵی ١٩٩٢ و لە یەکەم کابینەی حکوومەتی ھەرێمی کوردستاندا، وەک یەکەم وەزیری ڕۆشنبیری ھەڵدەبژێردرێت و خزمەتێکی زۆر بە بوارەکە دەکات. ھەوڵە ڕۆشنبیرییەکانی بەردەوام دەبێت و لە ساڵی ١٩٩٨ بە یارمەتیی کۆمەڵێک نووسەر و ھاوڕێی ڕووناکبیری، "دەزگای چاپ و پەخشی سەردەم" دادەمەزرێنێت، کە تا ئێستاش یەکێکە لە گرنگترین ناوەندەکانی چاپ و بڵاوکردنەوە لە کوردستان.
شێرکۆ بێکەس خاوەنی دەیان نامیلکە و دیوان و قەسیدەی درێژی شیعرییە (وەک: دەربەندی پەپوولە، گۆڕستانی چراکان، خاچ و مار و ڕۆژژمێری شاعیرێ، ئێستا کچێک نیشتمانمە). شیعرەکانی ئاوێنەی باڵانوێنی ئازارەکانی نەتەوەکەی، کارەساتی ھەڵەبجە و ئەنفال، سروشتی کوردستان، کێشەکانی ژنان و عەشقن. لە ساڵی ٢٠٠٩دا تەواوی بەرھەمەکانی لە دووتوێی نزیکەی ھەشت ھەزار پەڕەدا بە چاپ گەیاند.
سەرەنجام، دوای تەمەنێک لە داھێنان و خزمەت، لە ٤ی ئابی ٢٠١٣ لە نەخۆشخانەیەکی شاری ستۆکھۆڵمی پایتەختی سوید بەھۆی نەخۆشیی شێرپەنجەوە کۆچی دوایی کرد. بەپێی وەسیەتنامەکەی خۆی، تەرمەکەی گەڕێندرایەوە کوردستان و لەناو "پارکی ئازادی"ی شاری سلێمانی بە خاک سپێردرا، بۆ ئەوەی وەک خۆی حەزی دەکرد بەردەوام لە نزیک خەڵکەوە بێت و گوێی لە مۆسیقا و ھەنگاوی عاشقان بێت.
